Urrian Funtsarekin bat! kanpaina abiarazi genuen. Coop57ren oinarri sozial osoari zuzenduta, jaulkipenarekin 1,5 milioi euro lortu nahi genituen borondatezko ekarpenetan, Coop57ren funts propioak handitzeko eta, horrela, kooperatibaren finantza-kaudimena indartzeko.
Funts propioak funtsezkoak dira proiektu baten indarra zehazteko, haren jarduerari lotutako arriskuei une oro aurre egiteko gaitasuna zehazten baitute. Coop57ren kasuan, finantza-jardueraren arriskua jasotako maileguak itzuli ezin dituzten erakundeek sor dezaketen berankortasuna da. Espainiako Estatuko Finantza Etikoen 2023ko Barometroak, FETSek eginak, Coop57 printzipio etiko eta solidarioekiko konpromisoaren rankingaren buruan kokatzen du,% 98,5eko betetze-mailarekin. Espainiako Bankuak gogorarazi du banku konbentzionalen berankortasunaren batez bestekoa % 4,29koa dela. Coop57ren kasuan, % 1,67ra jaisten da.
Azken bost urteetan, gure finantza-jarduerak izugarrizko hazkundea izan du, abian dauden maileguen saldoa bikoiztuz. Era berean, funts propioen bilakaerak hazkunde-erritmo txikiagoa izan du, % 30 ingurukoa. Kaudimen maila altuak izaten jarraitzeko, beharrezkoa zen funts propioen hazkundeari bultzada handia ematea, horrela, bi aldagaien arteko proportzio egokia mantentzeko.
Helburua anbizio handikoa zen: ekarpenetan 1,5 milioi euro lortzea. Coop57ren bihotzarekiko konpromisoa eskatzen zuen, eraldaketa sozial, ekologiko, feminista, antiarrazista eta ekonomikoaren zerbitzura dagoen proiektu baten garapenarekin jarraitzea ahalbidetzen duten ekarpen egonkorrak egitea.
Erantzuna itzela izan zen. 45 eguneko epean jasotzea pentsatu genuena egun bakar batean iritsi zen. 27 ordutan jaulkipen osoa burutu zen. Babes ikaragarria jaso genuen, Coop57ren benetako altxorra bere oinarri soziala dela frogatzen duena.
Helburu hori betetzeak aukera eman digu funts propioen bilakaeran jauzi kualitatibo eta kuantitatibo bat egiteko; izan ere, nabarmen hobetu da haien bilakaera eta abian dauden maileguen saldoarekiko proportzioa, % 12tik gora kokatu baita. Ondorengo taulan ikus daiteke, urdinez, jaulkipen honek sortu duen jauzi positiboa.
Baina erronka ez da hemen amaitzen. Jaulkipen honekin funts propioak handitzeak etorkizuneko hazkunderako oinarriak finkatzea ahalbidetzen digu. Eta etorkizuneko hazkundea – mailegu berriak emateko gaitasuna besterik ez dena– zuen konpromisoarekin eta Coop57n konfiantza izaten jarraitzen baduzue soilik gauzatu ahal izango da. Coop57n aurrezten jarraitzea zuen diruari balioa ematea da, etorkizun jasangarria, soziala eta solidarioa marraztu ahal izateko.
